ಮರಳುಗಾಡಿದು...

ಕ್ಷಿತಿಜಕ್ಕಂಟಿದ ನೆಂಟನೇ

ಜೊತೆ ಸಾಗುವ ತುಸು ದೂರ

ವಿಶ್ರಮಿಸಿಕೊ ನೀನೂ ಅರೆಘಳಿಗೆ

ಒಂಟೊಂಟಿಯಾಗೇ ಜೊತೆಗಿರುವೆವು

ಏರಿಳಿತ ಎಲ್ಲಿಲ್ಲ ಹೇಳು

ಬದುಕಿದು ಮರಳುಗಾಡೆಂದಾದರೆ

ಬರಡೆಂದರ್ಥವಲ್ಲವೇ ಅಲ್ಲ

ಅಗೋ ಅಲ್ಲಿ ಜೀವ ಸೆಲೆ!

ಹತ್ತಿರದಲ್ಲೇ ಬದುಕ ಉಸಿರಾದ

ಪೊದೆ ಪೊದೆ ಹಸಿರು!

ತುಸು ಹೊತ್ತು ಬಿಸಿಯೇರಿ

ಬುಸುಗುಡುವ ಈ ಉಸುಕು

ನೀನೀರಿಗಿಳಿಯೇ ಝಳ ಜಾರಿ

ತಂಪಾಗಿ ಸುಖದ ಸುಪ್ಪತ್ತಿಗೆ

ಅರಿವಿರುವ ಜೀವ ಸೂತ್ರ

ಸಡಲಿಸಿದರೂ ದಿಕ್ಕಾಪಾಲಾಗದು

ವಿಶ್ರಮಿಸಿಕೊ ನೀನೂ ಅರೆಘಳಿಗೆ

ಜೊತೆ ಸಾಗುವ ತುಸು ದೂರ

ಕ್ಷಿತಿಜಕ್ಕಂಟಿದ ನೆಂಟನೆ